Шымкент қаласында тағы 30 отбасы жаңа пәтердің кілтін алды. Салтанатты рәсім «Көрме» орталығында өтіп, оған қала әкімі Ғабит Сыздықбеков қатысты.
Қала әкімі қоныс тойын тойлап жатқан тұрғындарды құттықтап, отбасыларына амандық пен бақ-береке тіледі. Сондай-ақ, тұрғындарды қолдауға және олардың өмір сүру сапасын арттыруға бағытталған баспана бағдарламаларын іске асыру жұмысының маңызын атап өтті.
Айта кетейік, баспаналар «Отбасы банк» АҚ-ның «2-10-20» және «5-10-20» жеңілдетілген ипотекалық бағдарламалары аясында берілді. Жаңа пәтерлер Бозарық шағынауданында орналасқан. Пәтер иелерінің қатарында көп балалы отбасылар, жетім балалар мен ата-анасының қамқорлығынсыз қалған балалар, сондай-ақ, бюджет саласының қызметкерлері бар.
Қалада тұрғындардың баспана мәселесін шешу мүмкіндіктерін кеңейтуге бағытталған іс-шаралар жүйелі жүзеге асырылып келеді. Бұл бағыттағы жұмыс мемлекеттік бағдарламалар мен Мемлекет басшысының тапсырмалары аясында жалғасуда.
