Асхат Аймағамбетов мұғалімдерге сыйлық беру мәселесіне қатысты пікір білдіріп, ұстаздарға мәжбүрлі түрде ақша жинаудың заңға қайшы екенін айтты. Депутаттың сөзінше, ата-аналардан қысыммен қаржы жинау — дұрыс емес, алайда қарапайым алғыс ретінде гүл сыйлауды қоғамда үлкен мәселеге айналдыру орынсыз.
Аймағамбетов бұл мәселе төңірегінде қоғамда түрлі пікір қалыптасқанын атап өтті. Оның айтуынша, ең бастысы — ата-аналарға немесе оқушыларға қысым көрсетілмеуі керек.
— Мұғалімдерге мәжбүрлі түрде сыйлық жинау, ақша талап ету — заңға қайшы әрекет. Бірақ ұстазға құрмет ретінде гүл сыйлап, рақмет айтуда тұрған ештеңе жоқ, — деді депутат.
Сонымен қатар ол ұстаз еңбегін бағалау мен жемқорлықтың ара-жігін ажырата білу қажеттігін жеткізді. Депутаттың пікірінше, кей жағдайда қоғам кез келген сыйлықты дауға айналдырып, мәселенің мәнін жоғалтып алады.
Аймағамбетов мұғалім мәртебесін көтеру тек заңмен емес, қоғамның құрметі арқылы да қалыптасатынын атап өтті. Оның айтуынша, ұстазға шынайы алғыс білдіру мәдениетін «міндетті ақша жинаумен» шатастырмау қажет.
Соңғы жылдары Қазақстан мектептерінде ата-аналардан түрлі мерекеге орай ақша жинау мәселесі жиі талқыланып келеді. Білім саласында мұндай әрекеттерге тыйым салынғанымен, қоғамда ұстаздарға алғыс білдірудің шегі қандай болуы керек деген пікірталас әлі де жалғасып жатыр.
