aspan

Шымкент қаласының бұрынғы көші-қон полициясы басшысы виза сатқаны үшін сотталды

Женис Әуелбеков шетел азаматтарына виза рәсімдеу кезінде бірнеше рет пара алғаны үшін кінәлі деп танылды. Оған 24,5 миллион теңге айыппұл салынып, мемлекеттік қызметте жұмыс істеу құқығынан өмір бойына айырылды.

Шымкент қаласы көші-қон полициясы басқармасы бастығының міндетін атқарған Женис Әуелбековке қатысты сот үкімі заңды күшіне енді.

Шымкент қаласының ауданаралық қылмыстық сотының үкіміне сәйкес, Әуелбеков қызметтік лауазымын пайдаланып, Қазақстанға жұмысқа орналасу, білім алу және басқа да мақсаттармен келгісі келетін шетел азаматтарына виза беру туралы өтініштерді жеке өзі бақылаған.

Маусым айының басында ол жергілікті өндіріс орындарына жұмыс істеу үшін Шымкентке келген Қытай Халық Республикасының 18 азаматына виза рәсімдеген. Бұл қызметі үшін әрқайсысынан 30 мың теңгеден алған. Жалпы сомасы 540 мың теңгені құраған. Ақша визаны кедергісіз әрі жедел рәсімдеп беру үшін алынған.

Бұдан кейін Әуелбеков Ауғанстан мен Түркиядан келген екі кәсіпкерге рұқсат құжаттарын жедел рәсімдеп беру үшін тағы 100 мың теңге алған.

Көп ұзамай оны Шымкент қаласы бойынша ҰҚК департаментінің Сыбайлас жемқорлыққа қарсы қызмет өкілдері ұстаған.

Сот отырысында Әуелбеков өз кінәсін толық мойындаған. Ол отбасындағы жалғыз асыраушы екенін, бала кезінен лимфобластты лейкозбен ауыратынын, сондай-ақ созылмалы С гепатиті мен екінші типтегі қант диабеті бар екенін айтқан. Сонымен қатар, оның туғаннан бері мүгедектігі бар және ерекше күтім мен емдеуді қажет ететін баласы бар. Осы жағдайларды ескере отырып, сотталушы бас бостандығынан айырумен байланысты емес жаза тағайындауды сұраған.

Іс жеңілдетілген тәртіппен қаралғандықтан, сот оның кінәсі толық дәлелденді деген қорытындыға келген. Дәлелдер қатарында сотталушының мойындауы, куәлардың айғақтары, сараптама қорытындылары, алынған құжаттар мен бейнежазбалар, банк шоттарынан алынған үзінділер, тергеу әрекеттерінің хаттамалары, жасырын тергеу әрекеттері барысында жиналған мәліметтер және басқа да заттай дәлелдер болған.

Сот үкімімен Женис Әуелбековке 24,5 миллион теңге көлемінде айыппұл салынды. Оған айыппұлды ерікті түрде төлеу үшін бір ай мерзім берілген. Бұдан бөлек, ол мемлекеттік қызметте лауазым атқару құқығынан өмір бойына айырылып, «подполковник» арнайы атағынан айырылды.

Сондай-ақ сотталған азамат Қытай азаматтарынан алған 600 мың теңгені мемлекет бюджетіне қайтаруға міндеттелді. Ал Ауғанстан мен Түркия азаматтарынан алған 100 мың теңге тиісті тұлғаларға қайтарылуы тиіс.

Женис Әуелбеков сот үкіміне шағым түсірмеген. Осылайша, оған қатысты сот шешімі заңды күшіне енді.

ҚАТЫСТЫ ПОСТТАР

«ШЫМКЕНТ – ҚАУІПСІЗ ЖӘНЕ ҚОЛАЙЛЫ ҚАЛА»

КІТАП ОҚУ – ҚОҒАМНЫҢ ИНТЕЛЛЕКТУАЛДЫ ДАМУЫНЫҢ КІЛТІ

ШЫМКЕНТ АГРОӨНДІРІСІНДЕ ТҰРАҚТЫ ӨСІМ МЕН ӨНІМ КӨЛЕМІНІҢ АРТУЫ БАЙҚАЛАДЫ

Пікір қалдырыңыз