Қазақстан Республикасының Қаржылық мониторинг агенттігі Шымкент қаласы бойынша департаменті «Капитал» атауымен жасырын әрекет еткен қаржы пирамидасына қатысты қылмыстық істі тергеп жатыр. Тергеу мәліметінше, күдіктілер инвестициялық платформа ретінде көрініп, азаматтарды жоғары табыс уәдесімен алдаған.
Ведомствоның хабарлауынша, ұйымдастырушылар әлеуметтік желілер арқылы тұрғындардан 20 мыңнан 500 мың теңгеге дейін қаражат тартқан. Салымшыларға небәрі 3–5 күн ішінде бастапқы салымның 30–50 пайыз көлемінде табыс түсетіні айтылған.
Тергеу барысында күдіктілердің азаматтарды тарту үшін психологиялық ықпал ету тәсілдерін пайдаланғаны анықталған. Атап айтқанда, «жылдам әрі оңай табыс», «шектеулі уақыттағы мүмкіндік» секілді уәделер арқылы адамдарды қаржылық тәуекелдерді толық сараламай шешім қабылдауға итермелеген.
Алайда салымшыларға ұсынылған жоғары табыс ешқандай нақты кәсіпкерлік қызметпен немесе заңды келісімшарттармен қамтамасыз етілмеген. Құқық қорғау органдарының мәліметінше, бұрынғы қатысушыларға төленген қаражат жаңа салымшылардан түскен ақша есебінен беріліп отырған.
Қазіргі таңда қаржы пирамидасына 900-ден астам адам тартылғаны белгілі болды. Ал тұрғындар салған жалпы қаражат көлемі 700 миллион теңгеден асқан.
Қаржылық мониторинг агенттігі қазіргі уақытта тергеу амалдары жалғасып жатқанын мәлімдеді. Қазақстан Республикасының Қылмыстық-процестік кодексінің 201-бабына сәйкес өзге ақпарат жария етілмейді.
Сонымен қатар агенттік азаматтарды күмәнді инвестициялық жобалардан сақ болуға шақырды. Мамандар қысқа мерзімде жоғары табыс уәде ететін платформалардың басым бөлігі алаяқтық схема болуы мүмкін екенін ескертеді.
— Инвестиция жасамас бұрын ұйымның заңды тіркелгенін, лицензиясы мен рұқсат құжаттарының бар-жоғын мұқият тексеру қажет, — деп ескертті ведомство өкілдері.
