Шымкент қаласындағы Қажымұқан Мұңайтпасов атындағы орталық стадионда футболдан Қазақстан чемпионатының алғашқы туры қарсаңында жаңа Конституцияны қолдауға арналған ауқымды концерттік бағдарлама ұйымдастырылды.
Іс-шараға мыңдаған жанкүйер жиналып, үлкен спорттық мерекенің куәсі болды. Концерт барысында қазақстандық эстрада жұлдыздары өнер көрсетіп, көрермендерге ерекше көңіл-күй сыйлады.
Сонымен қатар стадионда жаңа Конституцияның негізгі қағидаттарын насихаттайтын баннерлер орналастырылып, заң үстемдігі, әділетті қоғам құру, азаматтардың тең құқығын қамтамасыз ету және мемлекет пен халықтың бірлігі туралы мазмұнды үндеулер көрсетілді.
Мерекелік бағдарлама жанкүйерлерді алдағы «Ордабасы» – «Ертіс» матчының алдында ерекше атмосфераға бөлеп, стадиондағы спорттық рухты күшейте түсті. Чемпионаттың алғашқы турындағы тартысты кездесуді тамашалау үшін стадионға мыңдаған жанкүйер жиналды.
