Қазақстан Президенті Қасым-Жомарт Тоқаев АҚШ пен Иран арасында қол жеткізілген келісімге байланысты мәлімдеме жасап, тараптардың мәмілеге келуін халықаралық қауіпсіздік пен тұрақтылық жолындағы маңызды қадам ретінде бағалады.
Бұған дейін АҚШ пен Иран өкілдері келісімге келгендерін жариялаған болатын. Сонымен қатар Ливанда атысты тоқтату жөнінде уағдаластыққа қол жеткізілгені хабарланды. АҚШ президенті Дональд Трамп Ормуз бұғазы арқылы халықаралық кеме қатынасы қайта жанданатынын, сондай-ақ Иранға қатысты теңіз блокадасы тоқтатылатынын мәлімдеді.
Мәліметтерге сәйкес, тараптар арасындағы түпкілікті құжатқа жақын арада Женева қаласында қол қойылмақ.
Осыған байланысты пікір білдірген Мемлекет басшысы келісімнің өңірлік және жаһандық қауіпсіздік үшін маңыздылығына тоқталды.
“Осы маңызды кезеңде батылдық пен стратегиялық көзқарас танытқан АҚШ президенті Трамптың көшбасшылығын ерекше атап өтеміз. Сонымен қатар Иран Ислам Республикасы басшылығының сындарлы ұстанымын құптаймыз”, – деді Қасым-Жомарт Тоқаев.
Президенттің айтуынша, дипломатиялық диалог пен өзара түсіністік халықаралық дағдарыстарды бейбіт жолмен шешудің ең тиімді тетігі болып қала береді. Қазақстан тарапы да әрдайым келіссөздер арқылы тұрақтылықты нығайтуға бағытталған бастамаларды қолдайтынын жеткізді.
Сарапшылардың пікірінше, АҚШ пен Иран арасындағы ықтимал келісім Таяу Шығыстағы геосаяси ахуалға елеулі әсер етіп, өңірдегі шиеленісті төмендетуге мүмкіндік беруі мүмкін. Сонымен қатар Ормуз бұғазы арқылы кеме қатынасының қайта жандануы әлемдік энергетикалық нарыққа да оң ықпал етуі ықтимал.
Женевада өтетін рәсімнен кейін тараптар келісімнің нақты шарттары мен оны іске асыру тетіктерін жариялайды деп күтілуде.
