Жетісу облысындағы дүкенде болған жарылыс салдарынан үш адам зардап шекті, деп хабарлайды өңірдің төтенше жағдайлар департаментінің (ТЖД) баспасөз қызметі.
«2026 жылғы 15 ақпанда шамамен сағат 18.45-те Ескелді ауданы Қарабұлақ ауылында орналасқан «Малика» азық-түлік дүкенінде газ-ауа қоспасының жанусыз жарылысы болды. Оқиға салдарынан сыртқы қабырға мен шатырдың бір бөлігі құлап, зақымдану аумағы шамамен 36 шаршы метрді құрады. Оқиға нәтижесінде 3 адам зардап шекті, тексеруден кейін олар орталық аудандық ауруханаға жеткізілді. Олардың жағдайы – орташа ауырлықта, тұрақты, есін біледі», — делінген хабарламада.
Оқиға орнына Жетісу облысы ТЖД күштері мен құралдары жедел түрде жеткені, 27 жеке құрам қызметкері және алты бірлік техника жұмылдырылғаны атап өтілді.
«Қазіргі уақытта оқиғаның мән-жайы анықталуда», — деп қосты ТЖД.
ДҮКЕНДЕГІ ЖАРЫЛЫС САЛДАРЫНАН ҮШ АДАМ ЗАРДАП ШЕКТІ
