Алматыда жол ережесін елемеген жеңіл көлік мопедті қағып кетті. Бағдаршамның қызыл түсіне тоқтамай, қиылыстан өтпек болған жүргізушінің кесірінен курьер ауыр жарақат алған.
Салтанат Әзірбек, Алматы қаласы ПД ресми өкілі:
— Жол-көлік оқиғасы кеше кешке Алмалы ауданында Төле би даңғылы және Әуезов көшелерінің қиылысында орын алды. Мопед жүргізушісі ауыр дене жарақаттарымен ауруханаға жеткізіліп, қазір ем қабылдауда. Алмалы аудандық полиция басқармасының қызметкерлері тиісті сараптама зерттеулерін тағайындап, тергеуге кірісті.
Бағдаршамға бағынбаған Toyota шығыс бағытта келе жатқан мопедті қаққан. Соққының қатты болғаны соншалық, қос дөңгелекті көліктің сау тамтығы қалмапты. Зардап шеккен курьер қазір ем алып жатыр. Өткен бейсенбіде де қаланың қақ ортасында жеңіл көлік мопедті қағып, жүргізуші оқиға орнынан қашып кеткен болатын. Полицейлер оны тез арада қолға түсіріп, жауапкершілікке тартты.
АЛМАТЫДА МОПЕДТІ ЖЕҢІЛ КӨЛІК ҚАҒЫП, КУРЬЕР ЖАРАЛАНДЫ
