Ішкі істер министрлігі есірткі қылмысымен күресуге бағытталған «Дәрмек» операциясының қорытындысын шығарды, – деп хабарлайды Aspan.info тілшісі polisia.kz сайтына сілтеме жасап.
Ішкі істер министрлігі Есірткі қылмысына қарсы күрес басқармасының қызметкерлері ел аумағында «Дәрмек» республикалық жедел-профилактикалық іс-шарасын өткізді.
Операция барысында өз қызметінде дәрілік заттарды қолданатын 900-ге жуық кәсіпорын мен ұйым тексерілді. Есірткі және улы заттармен айналысу саласында 22 қылмыстық құқық бұзушылық анықталды. Әкімшілік жауапкершілікке 230 адам тартылды, оның ішінде 48 медицина қызметкері. Сақтау шарттарын бұзғаны үшін 43 келі есірткі және психотроптық заттар, 9 мыңнан астам таблетка және 15 мыңға жуық ампула медициналық препараттар тәркіленді. 3 тоннадан астам прекурсорлардың айналымы лицензиялық нормалардың және оларды сақтау қоймаларының техникалық беріктігі талаптарының бұзылуына байланысты шектелген.
«Мәселен, Солтүстік Қазақстан облысындағы өнеркәсіп нысандарының бірінің аумағын тексеру кезінде улы заттармен жұмыс істеу ережелерін бұза отырып сақталған 45 келі сынап табылып, тәркіленді. астаналық медициналық ұйымда есірткі құралдарын сақтау және жою ережелерін бұзу фактілері анықталды, олардан 350 ампула морфин тәркіленді.Мұндай бұзушылықтар үшін 160 АЕК мөлшерінде айыппұл салу немесе 40 тәулікке дейін қамауға алу жазасы қарастырылған. бұл бағыт жалғасын табуда», – деді департамент басшысы – Ішкі істер министрлігінің ресми өкілі Шыңғыс Әлекешев.
Осыған дейін Астанада есірткі заттарын өндіріп, сатқаны үшін іздеуде жүрген ресейлік азамат ұсталған болатын.
