Түркістан қаласында алғаш рет теннистен 16 жасқа дейінгі спортшылар арасында өтетін «Tennis Europe 16&Under Turkestan G3» халықаралық турнирінің жалауы көтерілді.
Беделді додаға көршілес Өзбекстан, Қырғызстан, Ресей мемлекеттерінен және Қазақстанның әр өңірінен іріктелген жас теннисшілер қатысуда. Жалпы жарысқа 32 ұл және 32 қыз спортшы қатысып, өзара мықтыларын анықтайды.
Халықаралық турнирдің салтанатты ашылу рәсіміне Түркістан облыстық дене шынықтыру және спорт басқармасының басшысы Ғалымжан Худияров, Түркістан теннис клубының директоры Алмас Таушаев, облыстық жоғары спорт шеберлігі мектебінің директоры Шынболат Райханов қатысып, жас спортшыларға сәттілік тіледі.
Рухани шаһарда ұйымдастырылып отырған бұл халықаралық жарыстың негізгі мақсаты – өңірде теннис спортын дамыту, жас спортшылардың тәжірибе алмасуына мүмкіндік жасау және бұқаралық спортты кеңінен насихаттау.
Айта кетейік, тартысты бәсеке 16-20 наурыз аралығында өтеді. Турнир қорытындысы бойынша жеңімпаздар мен жүлдегерлер арнайы медальдармен, кубоктармен және алғыс хаттармен марапатталады.
