Шымкент қаласында қысқы маусымға дайындық жұмыстары жүйелі түрде жүргізіліп, қаланың инженерлік инфрақұрылымын жетілдіру бағытында кешенді шаралар қабылдануда. Ауа райының қолайсыз жағдайларына қарамастан, қала тұрғындарының қауіпсіздігін қамтамасыз ету және көлік қозғалысының үздіксіздігін сақтау негізгі басымдықтардың бірі болып табылады.
Қысқы кезеңде қала аумағындағы 443 магистралды көшені күтіп-ұстау және қардан тазалау жұмыстарына мемлекеттік-жекешелік әріптестік аясында 5 серіктес мекеме тартылған. Аталған жұмыстарды уақытылы әрі сапалы атқару үшін барлығы 243 бірлік арнайы техника қыс мезгіліне толық дайындалды. Қар жауған кезеңдерде тазалау жұмыстарына күн сайын шамамен 2 мыңға жуық жұмысшы жұмылдырылып, жол қауіпсіздігін қамтамасыз ету бағытында тәулік бойы қызмет көрсетіледі. Қаланың әрбір ауданында 180 шақырымнан 350 шақырымға дейінгі көше желісінде 37-ден 62-ге дейін арнайы техника тұрақты түрде жұмыс істейді.
Сонымен қатар, қысқы маусымға қажетті инертті материалдар қоры толықтай жасақталды. Атап айтқанда, 25 000 текше метр құм және 15 000 тонна тұз сатып алынып, мұзға қарсы күрес шараларына дайындалды. Қарды уақытша жинау және шығару орындары алдын ала белгіленіп, тиісті тәртіппен бекітілді.
Инженерлік инфрақұрылымды дамыту аясында су арналары бойынша бірқатар маңызды жобалар жүзеге асырылды. «Қошқар-ата» өзені жағалауын абаттандыру жұмыстары аяқталып, қала тұрғындары үшін қолайлы демалыс аймақтары қалыптастырылды. Сонымен қатар, «Ақжар» су қоймасын жаңғырту жұмыстары жүргізіліп, су жинау және реттеу мүмкіндіктері артты. «Ақсай–Қарабастау» және «Кәусар» каналдарының құрылысы толық аяқталып, қаладағы су өткізу жүйесінің тиімділігі айтарлықтай жақсарды. Бұдан бөлек, жалпы ұзындығы 268 шақырымды құрайтын каналдар механикалық тазалаудан өткізіліп, су өткізу қабілеті күшейтілуде.
«Бадам» өзенінің бойында су тасқыны қаупін азайту мақсатында 9 шақырым аумақта арна нығайту жұмыстары жүргізілді. Ал 2025 жылы өзеннің ең қауіпті деп танылған 5,3 шақырымдық бөлігін қайта жаңарту жұмыстары басталып, гидротехникалық қауіпсіздікті арттыру көзделіп отыр.
Қала микроклиматын жақсарту мақсатында бірқатар инновациялық шешімдер енгізілуде. Атап айтқанда, «БМК» каналынан «Жаңа Шек» каналына тәулігіне 200–250 литр/секунд көлемінде су жіберіліп, орталық көшелерді ылғалдандыру жүйесі іске қосылды. Бұл шара жаз мезгілінде ауа температурасын төмендетіп, шаң-тозаңның алдын алуға мүмкіндік береді. Алдағы уақытта аталған жүйені Кіші Самал шағынауданы мен Абай саябағы бағытында кеңейту жоспарланып отыр.
Сонымен бірге, қала аумағында орналасқан субұрқақтар инфрақұрылымына да ерекше көңіл бөлінуде. Қазіргі таңда Шымкент қаласында 86 субұрқақ жұмыс істейді, оның 41-і қалалық жайлы ортаны дамыту басқармасының теңгерімінде. Биыл барлық субұрқақтар бекітілген жоспарға сәйкес үздіксіз жұмыс істеп, қала көркін арттырды. Сонымен қатар, тұрғындардың демалысы мен эстетикалық орта қалыптастыру мақсатында 18 жаңа субұрқақ салынды. 2025 жылы субұрқақтарды күтіп-ұстау және қызмет көрсету жұмыстарына 250 миллион теңге қаржы бөлініп, су сорғылары толық жаңартылды. Қазіргі уақытта барлық субұрқақтар қысқы маусымға дайындалып, арнайы талаптарға сай консервациялау жұмыстары жүргізілуде.
Жалпы алғанда, атқарылған жұмыстар мен қабылданған шаралар Шымкент қаласының қысқы кезеңге дайындық деңгейін арттырып, инженерлік инфрақұрылымның тұрақты әрі қауіпсіз жұмыс істеуін қамтамасыз етуге бағытталған.
