Шымкент қаласында 2024–2025 жылдары жол-көлік инфрақұрылымын дамытуға бағытталған ауқымды жобалар іске асырылды. Қала әкімдігі осы бағыттағы жұмыстарды жүйелі түрде жүргізіп, тұрғындардың көлік қозғалысын жеңілдету, жол сапасын арттыру және көлік қауіпсіздігін қамтамасыз етуге ерекше көңіл бөлді.
Осы екі жыл ішінде қала аумағында жалпы ұзындығы 1 328,5 шақырым жол пайдалануға берілді. Оның ішінде 2024 жылы 269,5 шақырым, ал 2025 жылдың 12 айының қорытындысымен 1 059 шақырым жол іске қосылды. Бұл көрсеткіш жол инфрақұрылымын дамытуда айтарлықтай өсімді көрсетеді және қала көшелерінің сапасын едәуір жақсартуға мүмкіндік берді.
2024 жылы іске қосылған ірі жобалар
2024 жылы көлік инфрақұрылымын дамыту аясында жалпы ұзындығы 20,1 шақырымды құрайтын 4 көше пайдалануға берілді. Бұл жобалар қатарында А-2 айналма жолын қайта құрудың 4-кезеңі, Өтегенов көшесінің 1 және 2-кезектері, сондай-ақ Оңтүстік айналма жолы бар. Осы жұмыстар қаладағы негізгі магистральдарды жаңғыртуға және жол қозғалысын жеңілдетуге бағытталды.
2025 жылы іске асырылған жобалар
2025 жылы ұзындығы 21,1 шақырымды құрайтын 6 ірі жоба іске қосылды. Мемлекет басшысының өңірге жасаған жұмыс сапары барысында берілген тапсырмаға сәйкес, А-2 айналма жолының негізгі бөліктері қайта құрудан өтіп, 6 және 8-кезеңдері пайдалануға берілді. Осылайша нысанның орындалу деңгейі 90 пайызға жетті. Сонымен қатар, қаланың орталығын Ташкент – Алматы тас жолымен байланыстыратын Қонаев даңғылының жалғасы бойынша құрылыс жұмыстары 85 пайызға орындалып, биыл 2-кезеңі пайдалануға берілді. Аталған жобаны толық аяқтау 2026 жылға жоспарланған.
Теміржол өткелдері мен жолайрықтар
Қаланың шығыс бөлігі мен орталығын байланыстыратын Момынов және Тіленшин көшелеріндегі екі ірі теміржол өткелінің құрылысы қарқынды жүргізілуде. Аталған нысандарды келесі жылы пайдалануға беру жоспарланып отыр. Сондай-ақ, Бәйдібек би және Төлеметов көшелерінің қиылысында жаңа жолайырықтың құрылысы басталды. Бұл жобалар көлік кептелістерін азайтуға және негізгі жолдарға балама бағыттар қалыптастыруға бағытталған.
Жолдарды байланыстыру және қосымша бағыттар
Алтынсарин, Қазиев, Ақсүмбе, Шұбаркөл, Алатау батыр – Абылайхан көшелерін өзара байланыстыру және теміржол өткелдерін салу арқылы қозғалыс қарқыны жоғары учаскелерде қосымша балама бағыттар қалыптастырылуда. Сонымен қатар, Жандосов көшесінің жалғасы, Асар–Шымсити шағын аудандарын байланыстыратын жол, Қызылсай шағын ауданына кіреберіс жолдар асфальтталып, пайдалануға берілді.
Күрделі жөндеу жұмыстары
Бұдан бөлек, жалпы ұзындығы 17,1 шақырымды құрайтын 6 көше мен 1 көпірде күрделі жөндеу жүргізілді. Оның ішінде 4 көше мен 1 көпір пайдалануға берілсе, 2 көше бойынша жұмыстар 2026 жылға өтпелі болып белгіленді. Бұл қаланың ескі жолдарын жаңғыртып, көлік қозғалысының сапасын арттыруға бағытталған маңызды қадам болып отыр.
Осылайша, Шымкент қаласында жол-көлік инфрақұрылымын дамыту бойынша атқарылған жұмыстар қаланың экономикалық дамуына, көлік қозғалысын жеңілдетуге және тұрғындардың қауіпсіздігін қамтамасыз етуге елеулі үлес қосуда. 2026 жылы бұл жобалардың толық аяқталуы қаладағы көлік инфрақұрылымын жаңа деңгейге көтереді.
