Мектептегі білім жолының алғашқы баспалдағы – бастауыш сынып. Баланың жеке тұлға болып қалыптасуы, оқу мәдениетінің, мінез-құлық дағдыларының қалыптасуы ең алдымен осы кезеңде жүзеге асады. Сондықтан да дәстүрлі Бастауыш сынып апталығы – ұстаздар мен оқушылардың шығармашылығын қолдайтын, білім сапасын арттыратын маңызды іс-шара.
Апталықтың мақсаты – бастауыш сынып оқушыларының қызығушылығын ояту, пәнге деген сүйіспеншілігін арттыру, олардың қабілеттерін ашу және мұғалімдердің инновациялық тәжірибесін таныту. Осы аптада түрлі пәндік сайыстар, зияткерлік ойындар, көрмелер, ашық сабақтар мен шығармашылық жобалар ұйымдастырылады. Мұндай шаралар балалардың ой-өрісін кеңейтіп қана қоймай, жауапкершілікке, ұйымшылдыққа, өз ойын еркін жеткізуге баулиды.
Бастауыш сынып мұғалімдері – баланың мектепке деген махаббатын қалыптастыратын алғашқы тұлғалар. Олардың еңбегі – ерекше құрметке лайық. Әрбір өткізілген іс-шарада мұғалімнің шығармашылығы, ізденісі және бала психологиясын терең түсінуі көрініс табады. Апталық барысында осы еңбектің нәтижелері жарқырап көрініп, жас ұрпақтың жетістіктері көпшілікке таныстырылады.
Бастауыш сынып апталығы – тек мерекелік көңіл күй ғана емес, білім сапасын дамытуға бағытталған тәжірибе алаңы. Бұл – шығармашыл ұстаздарды қолдаудың, оқушылардың бойындағы таланттарды танудың, ата-ана мен мектеп арасындағы ынтымақтастықты нығайтудың тамаша мүмкіндігі.
Қорытындылай келе, бастауыш – үлкен білім әлеміне ашылған алғашқы есік. Осы есікті айқара ашып, бала бойына білімнің негізін қалап жүрген барлық бастауыш сынып мұғалімдеріне алғыс айтамыз. Балаларымыздың болашағы жарқын, жүректері білімге құштар бола берсін!
№ 55 Жеңістің 50 жылдығы ЖББМ КММ-нің ұжымы
