Шымкент қаласының Маятас тұрғын алабында табиғат аясында жайлы әрі заманауи демалыс ұсынатын «Omir Shymkent» глэмпинг жобасы іске асырылуда. Жоба қаланың туристік әлеуетін арттырып, ішкі туризмді дамытуға, экологиялық мәдениетті қалыптастыруға және өңірдің инвестициялық тартымдылығын күшейтуге бағытталған.
Инвесторларға жалпы аумағы 53 гектар жер телімі бөлініп, жобаға 2,5 миллиард теңге инвестиция салынған. Құрылыс жұмыстарының алғашқы кезеңінде 15 құрылысшы тұрақты жұмыспен қамтылды. Бүгінгі таңда 9 глэмпинг, 2 капсулалық үй және мейрамхана ғимаратының құрылысы жүргізілуде.
Келесі кезеңде 38 глэмпинг, 18 капсулалық үй, заманауи мейрамхана, SPA-аймақ, бассейн, спорттық алаңдар, амфитеатр, сондай-ақ жылқы шаруашылығына арналған аумақ пен вино дайындау кешенін салу жоспарланған.
Жоба толық жүзеге асқанда, өңірде жаңа жұмыс орындары ашылып, экотуризм саласы жаңа серпін алады. Бұл бастама Шымкенттің туристік имиджін нығайтып, қаланы инвестиция тартуда тартымды орталықтардың біріне айналдыруға мүмкіндік береді.
