Былтыр елімізде тұрмыстық зорлық-зомбылық салдарынан 69 әйел мен 7 бала қаза болған. Бұл көз жұма қарайтын дерек емес. Ал енді әйеліне қорлық көрсеткен азаматтарға жаза күшейтілетін болады. Қорлық көрген нәзік жандылар қайда жүгіне алады?
Тұрмыстық зорлық-зомбылық кез келген қоғамның ауыр дерті. Жәбірленушілер, көп ретте, күш көрсетушінге материалдық не басқа жағынан тәуелді болады. Қынжылтатыны, көп жағдайда жәбір көрсетушілер жауапқа тартылмайды. Сондықтан, тұрмыстық зорлық-зомбылықтың алдын алу мемлекеттің де, қоғамның да үлкен міндеті.
Жыл сайын полицейлерге отбасылық жан-жалдарға байланысты 100 мыңнан астам шақыру келіп түседі. Полиция қызметкерлері, өз кезегінде, тұрмыстық зорлық-зомбылық туралы хабарламаларға ден қою шараларын қабылдайды. Жүгенсіз жүрген жігіттер енді жазадан жалтара алмайды.
