Мемлекет басшысы Қасым-Жомарт Тоқаев облыс әкімі Абай Нұрлан Ұранхаевты қабылдады. Мемлекет басшысы өңірдің 2023 жылға арналған әлеуметтік-экономикалық дамуының қорытындылары туралы есебін тыңдады, — деп хабарлайды Aspan.info тілшісі Ақорданың баспасөз қызметіне сілтеме жасап.
Қасым-Жомарт Тоқаев өткен жылы облыс экономикасына 568,9 миллиард теңге инвестиция құйылып, 132,7 пайызға, жеке инвестиция 131,5 пайызға өскенін хабарлады. Жұмыс істеп тұрған шағын және орта бизнес субъектілерінің саны 107,1 пайызға өсіп, 53,2 мыңға жетті.
Нұрлан Ұранхаев 2023 жылы өнеркәсіп өндірісі 105,1 пайызға, ауыл шаруашылығы 103,5 пайызға, құрылыс жұмыстары көлемі 119,1 пайызға өскенін баяндады.
Мемлекет басшысының тапсырмасы бойынша облыста инвестиция көлемі 1,9 триллион теңгені құрайтын 102 іс-шарадан тұратын Кешенді әлеуметтік-экономикалық даму жоспары жүзеге асырылуда. «Қаражыра» кен орнында көмір-химиялық кешен және қуаттылығы 1 ГВт үшінші жел электр стансасы құрылысының жобалары әзірленуде.
Аймақаралық шекаралық ынтымақтастықты дамытуға ерекше көңіл бөлінеді. Қытай Халық Республикасының ШҰАР-мен бірлесіп бірлескен инвестициялық жобалар мен уақытша шекаралық өткізу пунктін салу туралы келісімдерге қол жеткізілді. Туризмнің дамуына серпін беретін Семей – Тачен рейсін ашу жұмыстары жүргізілуде. Сондай-ақ Татарстан Республикасымен ынтымақтастықты дамыту бойынша Жол картасына қол қойылды.
Сондай-ақ Мемлекет басшысына ЖЭО-3 құрылысының техникалық-экономикалық негіздемесін әзірлеу барысы туралы баяндалды. Алдын ала есептеулер бойынша жоспарланған жылу қуаты 1200 Гкал/сағ және электр қуаты – 360 МВт болады. Сондай-ақ облыста халықты 100 пайыз таза ауыз сумен қамтамасыз ету мақсатында 46 жобаны жүзеге асыру жоспарлануда.
Әлеуметтік салада «Жайлы мектеп» ұлттық жобасы аясында 2025 жылға дейін 5700 орындық 11 мектеп салу жоспарлануда. «Ауылдық денсаулық сақтауды жаңғырту» Ұлттық жобасын жүзеге асыру аясында облыста 2025 жылға дейін құны 10,8 млрд теңгеге 65 алғашқы медициналық-санитарлық көмек көрсету нысаны салынады.
Кездесу қорытындысы бойынша Қасым-Жомарт Тоқаев өңірді одан әрі дамыту және тұрғындардың әл-ауқатын жақсарту бойынша бірқатар тапсырмалар берді.
